Rheimerlei, die 15.: Jan un Griet
Is dat Verzäll, wor dat eens wohr,
mer weiß et nit jenau.
Dat Brauchtum wör ohn die Lejend
wie statt „alaaf“ „helau“.
He weed en Kreechsmann su verihrt
wie net ens Heinrich Böll.
Worüm? Dä ärme Jan, dä kräch
me’m Jriet kei Fisternöll.
För Kölle ävver maht dä Poosch
die Handelswäje frei.
Em Kreech hät Kölle jot verdeent
mit Waffehehlerei.
Trotz Kurfürs blevv mer doch „neutral“,
vör’t Jrovve jov’t de Jan.
Un wor die Lage ens vertrack,
dä Jan jing immer ran.
Wat für en Held dat wöödt, dat Jriet
hätt nix vörussjesinn.
Ehr Mädcher all, o merkt üch dat,
dat mer ad bei Bejinn
vun ner Karrier en Riecher hätt,
wat us däm Kääl ens widd.
Un wenn de sühst, dat is en Hit,
dann jangk mit däm in’t Bett,
doch nit dovür un nit nor su,
et jeht öm Ihr un Jeld.
Bis de zo blöd un raffs dat nit,
laach üvver dich de Welt
uch noch im Hingerdrinn. Wat woodt
no uss däm Jan vun Wääth?
In singer dritten Ehe söß
dä jään in Rauh am Hääd.
Die hätt en ävver nor veraacht,
weil hä nit schrieve kunnt.
Eets wor er nor en ärme Knääch,
am Eng en ärme Hungk.
Vum Jriet weiß mer natürlich nix,
ich stell mer ävver vür:
Et jing no Huus, do waadt‘ e leck-
er Tuppes an der Dür.
Jan und Grete
Ist das Geschwätz, war das einst wahr,
man weiß es nicht genau.
Das Brauchtum wäre ohne die Legende
wie statt „alaaf“ „helau“.
Hier wird ein Kriegsmann so verehrt
wie nicht mal Heinrich Böll.
Warum? Der arme Jan, der kriegte
mit’m Grete keine Liebschaft.
Für Köln aber machte der Bursche
die Handelswege frei.
Im Krieg hat Köln gut verdient
mit Waffenhehlerei.
Trotz Kurfürst bleibt man doch „neutral“,
für’s Grobe gab’s den Jan.
Und war die lage mal vertrackt,
der Jan ging immer ran.
Was für ein Held das würde, die Grete
hat nichts vorausgesehn.
Ihr Mädchen alle, so merkt euch das,
dass man schon bei Beginn
von einer Karriere einen Riecher hat,
was aus dem Kerl mal wird.
Und wenn du siehst, das ist ein Hit,
dann geh mit ihm ins Bett,
doch nicht davor und nicht nur so,
es geht um Ehre und Geld.
Bist du zu blöd und raffst das nicht,
lacht über dich die Welt
auch noch im Hinterdrein. Was wurde
nun aus dem Jan von Werth?
In seiner dritten Ehe säß
der gern in Ruhe am Herd.
Die hat ihn aber nur verachtet,
weil er nicht schreiben konnte.
Erst war er nur ein armer Knecht,
am Ende ein armer Hund.
Vom Jriet weiß man natürlich nichts,
ich stelle mir aber vor:
Es ging nach Hause, da wartete ein net-
ter Partner an der Tür.
