Luurensrhein

Rheimerlei, die12.

De hellije drei Künninge

Kanzler un Ääzbischoff Rainald von Dassel
braht denne Mailänder ööntlich vill Brassel.
Mit singem Chef, Barbarossa, dem Ahle,
mäht hä de Stadt platt, un zunder bezahle
kläut hä de hellichste vun all dä Knoche,
die im de Kaiser ad vürher versproche:
Hellije Künninge, un sugar dreie,
Kölle woodt Pilgerstadt un dät jedeihe.

Äwwer jetz bruch mer e jrößer Kapellche,
Hildebolds Dom, dat wor’n Bagatellche,
Jeld wor jetz do, alsu dät mer flöck baue.
Baal dät de Fortschredd sich äwwer schlemm staue.
Sechshundert Johr moot dat Wöhle drom duure.
Mäht nix! De Schrein dun se hück noch jään luure.
Jekläut oder nit, et jitt nix zu beduure.